सुवाश मंडल
रौतहट, १७ चैत । रौतहट जिल्ला अदालतमा कार्यरत एक कर्मचारीलाई अख्तियार दुरुपयोग अनुसन्धान आयोगको टोलीले सेवाग्राहीबाट लिएको ५० हजार नगद रकम सहित पक्राउ गरेका छन् ।
जिल्ला अदालत गौरको विगो फाँटमा डिट्ठा पदको करारका कर्मचारी लवकुमार सिंह सेवाग्राहीबाट नगद ५० हजार रकम लिदै गरेको अवस्थामा रंगेहात अख्तियार दुरुपयोग अनुसन्धान आयोग हेटौडाको टोलीले पक्राउ गरेका हुन् ।
डिएसपी राजिव श्रेष्ठको कमाण्डमा खटिएका टोलीले करारका कर्मचारी सिंह सेवाग्राहीलाई अदालतको फैसला बमोजिम दा. खा. पुर्जी गरी जग्गा फुकुवा गराइदिन अनावश्यक रुपमा रकम माग गरेको र ति सेवाग्रहीले रकम दिइसकेको अवस्थामा अख्तिायरको टोलीले नियन्त्रणमा लिएको अख्तियारको विज्ञप्तीमा उल्लेख गरिएको छ ।
डिट्ठा सिंह पक्राउ परेपछि स्थलगत मुचुल्का उठाउन एवं बयानको कार्य अख्तियारको टोलीले गरिरहेको गौर नगरपालिका–१ का वडाध्यक्ष लालबाबु चौधरीले तराई टप संग भने ।
रंगेहात पक्राउ परेका सिंहलाई आवश्यक कारवाही एवं अनुसन्धानको लागि हेटौडा तर्फ लगिएको छ ।
स्मरण रहोस, अख्तियार दुरुपयोग अनुसन्धान आयोग हेटौडाको टोलीद्वारा अदालतको कर्मचारीलाई रंगेहात पक्राउ गरेपछि जिल्लामा भ्रष्ट कर्मचारीहरुमा खैलाबैला मचेका छन् ।
