सुवाश मंडल
​गौर, रौतहट ।। जिल्ला प्रहरी कार्यालय रौतहटले आर्थिक वर्ष २०८२/०८३ मा अपराध नियन्त्रण, शान्ति सुरक्षा र गैरकानुनी गतिविधि विरुद्ध आक्रामक रूपमा कार्य सम्पादन गरेको छ । प्रहरी उपरीक्षक सिताराम रिजालले आइतबार एउटा् पत्रकार सम्मेलन गरेर रौतहटको जिल्लाको वार्षिक प्रगति विवरण सार्वजनिक गरेका छन् । वार्षिक प्रगति विवरण अनुसार यस अवधिमा भन्सार छली, अवैध काठ, सवारी कारबाही र अवैध उत्खननबाट कुल ५ करोड ९२ लाख ५५ हजार ७२१ रुपैयाँ राजस्व संकलन भएको छ, जुन लक्ष्य भन्दा ५.२४ प्रतिशतले बढी हो ।
​

आर्थिक वर्षभरि रौतहटमा कुल १,१६२ वटा मुद्दा दर्ता भएका छन्, जसमध्ये ६८० वटा फर्स्योट भइसकेका छन् भने ४७२ वटा अनुसन्धानको क्रममा रहेका छन् । विभिन्न अपराधमा संलग्न ६१४ जनालाई प्रहरीले पक्राउ गरेको छ । त्यस्तै, अदालतको फैसला कार्यान्वयन तर्फ लक्ष भन्दा बढी सफलता हासिल गर्दै ४४८ जना फरार प्रतिवादीहरूलाई पक्राउ गरिएको छ। जसबाट ७६ वर्ष ११ महिना ११ दिन कैद भुक्तान र ६९ लाख ७१,८७४ रुपैयाँ जरिवाना असुल भएको छ ।
​

प्रहरी उपरीक्षक रिजालका अनुसार प्रहरीले लागुऔषध विरुद्धको अभियानमा ३९ वटा मुद्दा दर्ता गरी ५१ जनालाई पक्राउ गरेको छ। सो क्रममा ८४७ केजी ७२० ग्राम गाँजा, २५ ग्राम ५१० मिलिग्राम ब्राउनसुगर, ४,२६५ एम्पुल मनोदिपक पदार्थ र १३,९९६ वटा प्रतिबन्धित ट्याब्लेट बरामद गरिएको छ। यसैगरी, अवैध हातहतियार तर्फ ६ थान हतियार र ११ थान गोली सहित ३ जना र १ लाख ३६ हजार खोटा मुद्रा (जाली नोट) सहित ७ जना पक्राउ परेका छन् ।
​

सडक सुरक्षा तर्फ वर्षभरि १,०८८ वटा सवारी दुर्घटना भएका छन्, जसमा ५३ जनाको मृत्यु र १,६९६ जना घाइते भएका छन्। ट्राफिक नियम मिच्ने १०,२५५ वटा सवारी साधनलाई कारबाही गरी १ करोड १ लाख ३७ हजार रुपैयाँ राजस्व संकलन गरिएको छ । ​भन्सार छली तर्फ ठूलो सफलता हात पार्दै प्रहरीले १५५ वटा सवारी साधन नियन्त्रणमा लिनुका साथै १८ जनालाई पक्राउ गरेको छ। स्रोत नखुलेको १३ लाख ६२,२०० रुपैयाँ नगद सहित ४ जना पक्राउ परेका छन्। अवैध मदिरा नियन्त्रण अभियान अन्तर्गत ५ वटा भट्टी नष्ट गरी १,५४५ लिटर तयारी मदिरा र २,००० लिटर कच्चा पदार्थ बरामद गरिएको छ।
​

८ लाख १३ हजार ५७३ जनसंख्या र १,१२६ वर्ग किलोमिटर क्षेत्रफल रहेको रौतहट जिल्लामा ९०४ जनाको दरबन्दी (हाल ७७० जना कार्यरत) रहेको प्रहरीले जनस्तरमा पनि राम्रो प्रभाव छोडेको छ। वर्षभरि ९५४ वटा सामुदायिक कार्यक्रम संचालन गरिएका छन्, जसमा २४,३७३ जना स्थानीय नागरिकको सहभागिता रहेको थियो। जिल्ला प्रहरी कार्यालयबाट यस अवधिमा महिला, पुरुष, बालबालिका, ज्येष्ठ नागरिक र शारीरिक अशक्त गरी कुल १,३३,७७४ जना सेवाग्राहीहरू लाभान्वित भएका छन् । ​उत्कृष्ट कार्य गर्ने १६२ जना प्रहरी कर्मचारीलाई पुरस्कृत गरिएको छ भने अनुशासन उल्लंघन गर्ने २८ जनामाथि कारबाही समेत गरिएको छ ।

सुवाश मंडल
रौतहट ।। जबरजस्ती करणी मुद्धाका एक फरार प्रतिवादीलाई प्रहरीले रौतहटबाट पक्राउ गरेको छ । काठमाडौँको टंकेश्वरमा भएको जबरजस्ती करणीको घटनापछि लामो समयदेखि फरार रहँदै आएका रौतहट राजपुर नगरपालिका वडा नं. ८, अकोलुवाका २२ वर्षीय आफान आलम (परिवर्तित नाम ‘ड्राइभर’) लाई प्रहरीले पक्राउ गरेको हो । ​’परिवर्तित नाम ०८२/०८३ (३४) (क)’ को जाहेरीले वादी नेपाल सरकार रहेको उक्त मुद्धाका प्रतिवादी आलमलाई लुकिछिपी बसिरहेको अवस्थामा रौतहटको राजपुर नगरपालिका वडा नं. ४ बाट पक्राउ गरिएको हो ।
​
​प्रतिवादी आफान आलमले मिति २०८२ साल जेठ १५ गते काठमाडौँ महानगरपालिका वडा नं. १३, टंकेश्वरस्थित जाहेरवालाको डेरा कोठामा जबरजस्ती करणी गरेको अभियोग छ । उक्त वारदात पश्चात आलम काठमाडौँबाट फरार भई विभिन्न स्थानमा लुकिछिपी बस्दै आएका थिए ।
​

प्रहरी वृत्त कालिमाटी, काठमाडौँसँगको समन्वयमा विशेष टोलीले निजको निरन्तर खोजतलास गरिरहेको थियो । सोही क्रममा प्राप्त गोप्य सूचनाका आधारमा आज मिति २०८३ साल असार २९ गते दिउँसो अन्दाजी १२:०० बजे उनलाई गृहजिल्ला रौतहटबाट फेला पारिएको हो । ​पक्राउ परेका प्रतिवादी आलमलाई आवश्यक कानुनी कारबाहीका लागि प्रहरी वृत्त कालिमाटी, काठमाडौँ पठाइएको प्रहरीले जनाएको छ ।

सुवाश मंडल
​आग्रा ।। भारतको आग्रामा एक हप्तादेखि रहस्यमय बनेको एक व्यक्तिको बेपत्ता प्रकरणको डरलाग्दो रूप सार्वजनिक भएको छ। प्रारम्भिक प्रहरी अनुसन्धानका अनुसार, विगत ४५ दिनदेखि हराइरहेका भनिएका सुरेन्द्र नामका व्यक्तिको शव उनकै घरको बाथरुमको भुइँमुनि गाडिएको अवस्थामा फेला परेको छ ।
​
यसअघि मृतककी पत्नीले आफ्ना श्रीमान डेढ महिनादेखि बेपत्ता भएको भन्दै प्रहरीमा उजुरी दिएकी थिइन्। तर, अनुसन्धानका क्रममा घरभित्रै खानतलासी गर्दा प्रहरीको टोलीले बाथरुमको एउटा हिस्सामा भर्खरै नयाँ प्लास्टर र टाइल्स लगाएको फेला पार्यो। उक्त नयाँ निर्माणमाथि शंका लागेर उत्खनन गर्दा भुइँमुनि लुकाइएको अवस्थामा सुरेन्द्रको शव फेला परेको हो।
​घटना सार्वजनिक भएसँगै प्रहरीले मृतककी पत्नीलाई नियन्त्रणमा लिएर थप अनुसन्धान अघि बढाएको छ। अपराधको वास्तविक कारण र घटनामा अन्य व्यक्तिको संलग्नता भए/नभएकोबारे आधिकारिक निष्कर्ष आउन बाँकी नै छ ।
​
​यस्ता जघन्य र संवेदनशील अपराधका घटनाहरू सार्वजनिक भएसँगै सामाजिक सञ्जालहरूमा “महिला वा श्रीमतीहरूबाट हुने अपराधको प्रवृत्ति बढेको” भन्दै सतही टिप्पणीहरू हुने गरेको पाइन्छ। तर, समाजशास्त्र र अपराध विज्ञानका जानकारहरूका अनुसार कुनै एउटा विरलै घट्ने घटनालाई लिएर सम्पूर्ण समूह वा लिङ्गमाथि सामान्यीकरण (Generalization) गर्नु गलत र भ्रामक हुन्छ।

सुवाश मंडल
आन्ध्र प्रदेश (भारत) ।। भारतको आन्ध्र प्रदेशमा अन्धविश्वासका कारण एक व्यक्तिको ज्यान गएको दुःखद घटना सार्वजनिक भएको छ। आफूमा दैवी शक्ति रहेको र उड्न सक्ने दाबी गर्ने ४९ वर्षीय एक हिन्दू पुजारीको पहाडबाट हाम फाल्दा घटनास्थलमै मृत्यु भएको छ ।

भारतीय सञ्चारमाध्यमहरूका अनुसार ती पुजारीले आफूसँग अलौकिक क्षमता भएको र आफू हावामा उड्न सक्ने विश्वासका साथ एउटा अग्लो पहाडको चुचुरोबाट हाम फालेका थिए। तर, पहाडबाट हाम फाल्नासाथ उनी सिधै तल खसेका थिए र गम्भीर चोट लागेका कारण उनको घटनास्थलमै ज्यान गएको थियो । प्रारम्भिक अनुसन्धान र स्थानीय स्रोतका अनुसार ती पुजारी आफू वास्तवमै उड्न सक्ने भ्रम र अन्धविश्वासमा पूर्ण रूपमा परेका थिए। उनले यो कदम कुनै आत्महत्याको उद्देश्यले नभई आफ्नो ‘दैवी शक्ति’ प्रदर्शन गर्नका लागि चालेको बुझिएको छ।

घटनाको जानकारी पाउनसाथ स्थानीय प्रहरी टोली घटनास्थल पुगेको थियो। प्रहरीले शवलाई पोस्टमार्टमका लागि पठाएको छ र घटनाको पछाडि अन्धविश्वास मात्रै थियो कि वा ती पुजारी कुनै मानसिक समस्याबाट गुज्रिरहेका थिए भन्नेबारे विस्तृत अनुसन्धान सुरु गरेको जनाएको छ।
२१औँ शताब्दीमा पनि यस्ता अन्धविश्वासका कारण ज्यान गुमाउनु परेको भन्दै यस घटनाले सामाजिक सञ्जाल र स्थानीय स्तरमा चेतनाको कमीलाई लिएर गम्भीर बहस सिर्जना गरेको छ ।

सुवाश मंडल
मलङ्गवा, सर्लाही । । जिल्ला प्रशासन कार्यालय सर्लाहीका प्रमुख जिल्ला अधिकारी विजयराज सुवेदीले जिल्ला प्रहरी कार्यालय सर्लाहीको निरीक्षण भ्रमण गर्नुभएको छ। मङ्गलवार भएको उक्त निरीक्षणका क्रममा उहाँले कार्यालयका सम्पूर्ण शाखाहरूको वस्तुस्थिति र कार्यसम्पादनको वस्तुगत अनुगमन गर्नुभयो। निरीक्षण पश्चात् आयोजित एक विशेष कार्यक्रमका बीच प्रमुख जिल्ला अधिकारी सुवेदीले सम्पूर्ण प्रहरी कर्मचारीहरूलाई सम्बोधन गर्दै जिल्लाको शान्ति सुरक्षालाई थप सुदृढ र प्रभावकारी बनाउन निर्देशन दिनुभयो ।

नागरिकको जीउधनको सुरक्षा र कानुनको पालना गराउने कार्यमा प्रहरीको भूमिका सर्वोपरी रहन्छ। आम सर्वसाधारणले सुरक्षित र न्यायपूर्ण वातावरण महसुस गर्न सक्ने गरी कार्यसम्पादन गर्न आवश्यक छ । सर्लाही जिल्लाको समग्र शान्ति सुरक्षाको अवस्थालाई सधैँ चुस्त र दुरुस्त राख्न चौबीसै घण्टा सतर्क रहन आग्रह गरेको छ् । वर्तमान समयमा देखिन सक्ने विभिन्न सुरक्षा चुनौतीहरू तथा समसामयिक विषयवस्तुहरूलाई गम्भीरतापूर्वक लिँदै पूर्वतयारीका साथ काम गर्न निर्देशन दिएको छ् ।

सुवाश मंडल
कोहलपुर, बाँके ।। बाँकेको कोहलपुर नगरपालिकामा आफ्नै सहोदर भाइले दाइको बीभत्स हत्या गरेको सनसनीपूर्ण घटना सार्वजनिक भएको छ। कोहलपुर नगरपालिका वडा नम्बर ४ गोहवा बस्ने २० वर्षीय बिनोद चौधरीले आफ्ना २६ वर्षीय सहोदर दाइ मनोज चौधरीको कुटपिट गरी हत्या गरेका हुन् ।

प्रहरीका अनुसार आइतबार (असार १४ गते) साँझ करिब ७:०० बजे घटेको सामान्य घरायसी विवादमा बिनोदले दाइ मनोजमाथि घातक प्रहार गरेका थिए। कुटपिटबाट मनोजको घटनास्थलमै मृत्यु भएपछि आरोपी बिनोदले शव लुकाउने नियतले स्थानीय नहरमा फालेर फरार भएका थिए । घटनाको जानकारी पाएलगत्तै खटिएको इलाका प्रहरी कार्यालय कोहलपुर र जिल्ला प्रहरी कार्यालय बाँकेको संयुक्त टोलीले फरार अभियुक्तको खोजी तीव्र पारेको थियो ।

यसै क्रममा आज (सोमबार) बिहान करिब ६:३० बजे भारततर्फ भाग्दै गरेको अवस्थामा बिनोदलाई बाँकेकै कोहलपुर नगरपालिका वडा नम्बर १५ चनहवाबाट प्रहरीले नियन्त्रणमा लिन सफल भएको छ ।
मृतकको शवलाई पोस्टमार्टमका लागि भेरी अस्पताल, नेपालगंज पठाइएको छ,प्रहरी स्रोतले भन्यो। पक्राउ परेका अभियुक्तमाथि कर्तव्य ज्यान मुद्दामा म्याद थप गरी घटनाको वास्तविक कारण र थप विवरणबारे गम्भीर अनुसन्धान भइरहेको छ ।

सुवाश मंडल
बलरा , सर्लाही ।। सर्लाहीको बलरा नगरपालिकामा एक १५ वर्षीया बालिकामाथि जबर्जस्ती करणी (बलात्कार) को प्रयास भएको छ। बालिकालाई नियन्त्रणमा लिएर जबरजस्ती गर्न खोज्ने स्थानीय ४२ वर्षीय पुरुषलाई प्रहरीले नियन्त्रणमा लिएको छ।

प्रहरी र स्थानीय बासिन्दाका अनुसार बलरा नगरपालिका–४ निवासी ४२ वर्षीय फणिन्द्र सिंहले सोमबार दिउँसो करिब २ बजेको समयमा स्थानीय ती बालिकाको घरमा प्रवेश गरी जबर्जस्ती करणीको प्रयास गरेका थिए। सिंहले जबरजस्ती गर्न थालेपछि पीडित बालिकाले गुहार मागेकी थिइन्।
बालिका चिच्याएको आवाज सुनेर तत्कालै पुगेका स्थानीय बासिन्दाले आरोपी सिंहलाई घटनास्थलबाटै नियन्त्रणमा लिएका थिए। स्थानीयले उनलाई तत्कालै इलाका प्रहरी कार्यालय बलरामा बुझाएका हुन् ।

बलात्कारको आरोप लागेका सिंहलाई थप अनुसन्धान र कारबाहीका लागि जिल्ला प्रहरी कार्यालय सर्लाही पठाइएको छ। यता, पीडित बालिकालाई स्वास्थ्य परीक्षणका लागि सदरमुकाम मलङ्गवा लगिएको प्रत्यक्षदर्शी स्थानीय बासिन्दाले जानकारी दिएका छन् । यस घटनाका सम्बन्धमा जिल्ला प्रहरी कार्यालय सर्लाहीका सूचना अधिकारी एवं प्रहरी नायब उपरीक्षक (डिएसपी) बेदप्रसाद गौतमले आरोपी सिंह प्रहरी नियन्त्रणमा रहेको पुष्टि गरेका छन् ।

डिएसपी गौतमका अनुसार घटनाको गम्भीरतालाई ध्यानमा राख्दै प्रहरीले यस विषयमा सूक्ष्म अनुसन्धान सुरु गरिसकेको छ। “आरोपी हाम्रो नियन्त्रणमा छन् र घटनाबारे विस्तृत अनुसन्धान भइरहेको छ,” डिएसपी गौतमले भने, “अनुसन्धानको प्रक्रिया पूरा भएपछि मात्रै थप विवरण सार्वजनिक गर्न सकिन्छ।” प्रहरीले घटनाको कानुनी प्रक्रिया अगाडि बढाइसकेको जनाएको छ ।

सुवाश मंडल
माधोपुर ,रौतहट ।। रौतहट जिल्लाको माधव नारायण नगरपालिका–६, माधोपुरमा स्थानीय बासिन्दालाई शुद्ध खानेपानी उपलब्ध गराउने उद्देश्यले सुरु गरिएको खानेपानी आयोजना वर्षौंदेखि अलपत्र परेको छ। निर्माण सुरु भएको करिब ७–८ वर्ष बितिसक्दा पनि खानेपानी ट्याङ्की लगायतका संरचना अलपत्र अवस्थामा रहँदा स्थानीय बासिन्दा अझै पनि शुद्ध खानेपानीको अधिकारबाट वञ्चित छन् ।

करोडौँको लागतमा सुरु भएको यो योजना निर्माण कार्य अधुरै रोकिँदा माधोपुरका सयौँ परिवार दैनिक रूपमा खानेपानीको चरम अभाव झेल्न बाध्य भएका छन्। एक स्थानीयले आफ्नो दुख पोख्दै भन्ने,नेतृत्व फेरियो, तर फेरिएन अवस्था ‘जनप्रतिनिधिहरू आउँछन्, जान्छन्, तर हाम्रो दुःख जस्ताको तस्तै छ ।

आयोजना सुरु हुँदा सो पालिकाको नेतृत्व पूर्व नगर प्रमुख बिरेन्द्र प्रसाद यादव र पूर्व वडा अध्यक्ष राजिव कुमार यादवले गरेका थिए । उनीहरूको कार्यकाल सकिएर अहिले स्थानीय तहमा नयाँ नेतृत्व आइसकेको छ । वर्तमान अवस्थामा नगर प्रमुख बैधनाथ प्रसाद यादव (बैजु) र वडा अध्यक्ष राम नरेश रायले कार्यभार सम्हालिरहेका छन् । नेतृत्व परिवर्तन भए पनि अलपत्र परेको खानेपानी आयोजनालाई गति दिन कसैले ठोस पहल नगरेको स्थानीयहरुको आरोप छ । सम्बन्धित निकायको चरम बेवास्ता र ठेकेदारको ढिलासुस्तीका कारण राज्यको करोडौँको लगानी बालुवामा पानी हाले सरह भएको छ । समयमै योजना सम्पन्न नहुँदा एकातिर भौतिक संरचनाहरू जीर्ण बन्दै गएका छन् भने अर्कोतिर जनताले यसको प्रत्यक्ष मार खेपिरहेका छन्।

वर्षौंदेखि स्थानीय शुद्ध खानेपानीको पर्खाइमा छन् । अब पनि ढिलासुस्ती सह्य हुँदैन। वर्तमान मेयर बैधनाथ प्रसाद यादव (बैजु) र वडा अध्यक्ष राम नरेश रायले यस विषयलाई गम्भीरतापूर्वक लिई निर्माण कार्य यथाशीघ्र सम्पन्न गराउनुपर्छ र माधोपुरवासीलाई नियमित खानेपानीको व्यवस्था मिलाउनुपर्छ । स्थानीय बासिन्दाहरूले यस अलपत्र खानेपानी आयोजनालाई चाँडो भन्दा चाँडो सञ्चालनमा ल्याउन सम्बन्धित निकाय, ठेकेदार र वर्तमान जनप्रतिनिधिहरूसँग जोडदार माग गरेका छन् ।

सुवाश मंडल
गुवाहाटी ।। भारतको असम राज्यमा यतिबेला बाढीका कारण जनजीवन निकै कष्टकर बनेको छ। प्राप्त जानकारी अनुसार राज्यको धेमाजी जिल्लामा बाढीले उग्र रूप लिएको छ। बाढीको रूप कति भयावह छ भन्ने कुरा धेमाजीस्थित सिमेन नदीमा बनेको रेल्वे पुल आंशिक रूपमा भत्किएको घटनाबाट प्रष्ट हुन्छ। उत्तर-पूर्वी फ्रन्टियर रेल्वे (NFR) का एक अधिकारीले यस घटनाको पुष्टि गरेका छन् । यसैबीच, भारतका केन्द्रीय गृहमन्त्री अमित शाहले आज असमका मुख्यमन्त्री हिमन्त बिस्वा शर्मासँग फोनमा कुराकानी गर्दै राज्यको बाढी स्थितिको जानकारी लिनुभएको छ।

मुख्यमन्त्री शर्माले सामाजिक सञ्जाल ‘एक्स’ (ट्विटर) मा एक पोस्ट शेयर गर्दै यस कुराकानीबारे जानकारी दिनुभएको हो। उहाँका अनुसार गृहमन्त्री शाहलाई बाढी प्रभावित क्षेत्रमा राज्य सरकारद्वारा भइरहेको उद्धार, राहत तथा पुनर्स्थापनाका कार्यहरूबारे अवगत गराइएको छ।
जवाफमा गृहमन्त्री शाहले केन्द्र सरकारको तर्फबाट असमलाई सम्भव भएसम्मको सबै सहयोग र सहायता उपलब्ध गराउने प्रतिबद्धता व्यक्त गर्नुभएको छ। मुख्यमन्त्री शर्माले संकटको घडीमा चासो देखाएकोमा गृहमन्त्री शाहप्रति आभार प्रकट गर्दै लेख्नुभएको छ ।

सुवाश मंडल
रौतहट ।। रौतहटको गढीमाई नगरपालिकामा नदीमा डुबेर एक बालकको दुःखद मृत्यु भएको छ भने अर्का एक बालक अझै बेपत्ता भएका छन् । स्थानीय प्रशासन र प्रहरीका अनुसार गढीमाई नगरपालिका वडा नम्बर १ निवासी भन्टु यादवका छोरा युराज यादवको बागमती नदीमा डुबेर घटनास्थलमै मृत्यु भएको हो ।

समनपुर-बागमती पुल र टोकर घाट बीचको नदी क्षेत्रमा दुई जना बालकहरू अचानक डुबानमा परेका थिए। बालकहरू डुबेको थाहा पाउनासाथ स्थानीय बासिन्दा र सुरक्षाकर्मीको टोली उद्धारका लागि तत्काल घटनास्थलमा पुगेका थिए । उद्धार टोलीले खोजी गर्ने क्रममा बालक युराज यादवलाई मृत अवस्थामा फेला पारेर नदीबाट बाहिर निकालेको थियो।

दुर्घटनामा परेका अर्का बालक भने अझैसम्म फेला पर्न सकेका छैनन्। नदीको बहाव र गहिराइका कारण खोजी कार्यमा चुनौती थपिएको भए तापनि नेपाल प्रहरी, सशस्त्र प्रहरी र स्थानीय पौडीबाजहरूको सहयोगमा बेपत्ता बालकको खोजी कार्य तीव्र रूपमा जारी राखिएको छ ।