हनुमत कुमार यादव
रौतहट, १३ चैत ।। रौतहटको राजदेवी नगरपालिकामा “मेयर कप क्रिकेट प्रतियोगिता २०८२” को भव्य उद्घाटनसँगै नगरभर खेलकुदमय माहोल सिर्जना भएको छ । नगर प्रमुख भिखारी प्रसाद यादवले औपचारिक कार्यक्रमबीच प्रतियोगिताको उद्घाटन गर्दै खेलकुदले युवाहरूको सर्वाङ्गीण विकासमा महत्वपूर्ण भूमिका खेल्ने बताए । उनले स्वस्थ, अनुशासित र ऊर्जावान समाज निर्माणका लागि खेलकुद अपरिहार्य माध्यम भएको उल्लेख गर्दै नगरपालिकाले खेल क्षेत्रको विकासलाई उच्च प्राथमिकतामा राखेको स्पष्ट पारे ।
मेयर यादवले नगरभित्र रहेका प्रतिभाशाली खेलाडीहरूलाई पहिचान, प्रोत्साहन र अवसर प्रदान गर्ने उद्देश्यले यस्ता प्रतियोगिताहरू आयोजना गरिएको जानकारी दिए । उनले खेलकुदमार्फत युवाहरूलाई नकारात्मक गतिविधिबाट टाढा राख्दै सकारात्मक दिशातर्फ उन्मुख गराउन सकिने धारणा व्यक्त गरे । साथै, आगामी दिनहरूमा खेल मैदानको स्तरोन्नति, आवश्यक पूर्वाधार निर्माण तथा विभिन्न खेलकुद कार्यक्रमलाई निरन्तरता दिने प्रतिबद्धता समेत जनाए ।
कार्यक्रममा उपप्रमुख राजकुमारी साहले आफ्नो मन्तव्य व्यक्त गर्दै यस्ता प्रतियोगिताले युवाहरूमा अनुशासन, सहकार्य र नेतृत्व क्षमताको विकास गर्ने बताइन् । उनले नगरभित्रका प्रतिभाशाली खेलाडीहरूलाई प्रोत्साहन गर्दै खेलकुद क्षेत्रको समग्र विकासमा नगरपालिका प्रतिबद्ध रहेको धारणा राखिन् ।
त्यस्तै, प्रमुख प्रशासकीय अधिकृत उपसचिव बिकाउ यादवले खेलकुदले समाजमा सकारात्मक ऊर्जा प्रवाह गर्ने उल्लेख गर्दै स्वस्थ प्रतिस्पर्धामार्फत सामाजिक एकता मजबुत हुने बताए । उनले यस्ता कार्यक्रमलाई निरन्तरता दिन नगरपालिका सदैव सक्रिय रहने प्रतिबद्धता व्यक्त गरे ।
उद्घाटनसँगै सुरु भएको पहिलो खेल वडा नं. ३ (चन्डीया बसतपुर) र वडा नं. ६ बीच प्रतिस्पर्धात्मक रूपमा सम्पन्न भयो । टस जितेर पहिले ब्याटिङ गरेको वडा नं. ३ ले निर्धारित २० ओभरमा सबै विकेट गुमाउँदै २२६ रनको विशाल लक्ष्य प्रस्तुत गरेको थियो ।
जवाफी ब्याटिङमा उत्रिएको वडा नं. ६ ले लक्ष्य पछ्याउने क्रममा राम्रो सुरुवात गर्न नसक्दा १९ ओभरमै सबै विकेट गुमाउँदै मात्र ११९ रन बनाउन सफल भयो । यससँगै वडा नं. ३ ले १०८ रनको फराकिलो अन्तरले प्रभावशाली विजय हात पार्यो ।
खेलमा उत्कृष्ट प्रदर्शन गर्दै वडा नं. ३ का बाल्मिकि श्रीवास्तव ‘म्यान अफ द म्याच’ घोषित भए । उनले बलिङतर्फ उत्कृष्ट प्रदर्शन गर्दै ५ विकेट लिए भने ब्याटिङमा पनि २६ रनको महत्वपूर्ण योगदान दिएका थिए ।
प्रतियोगिताको पहिलो खेल नै रोमाञ्चक र उत्साहजनक बनेकोले आगामी खेलहरू अझ प्रतिस्पर्धात्मक र आकर्षक हुने अपेक्षा गरिएको छ ।
